خواطر من رحلة أبويزن الي سالزبورغ – النمسا مايو 2012 الجزء الثاني

خواطر من رحلة سالزبورغ – النمسا مايو 2012الحلقة الثانية ( اليوم الحافل )

بداية يومنا الثاني اصبحنا واصبح الملك لله نمنا بعمق من التعب ، تناولنا الفطور بالفندق واستفسرت من الفندق عن بعض الطرق والمواقع بعد ما وريتهم برنامجنا لهذا اليوم واللي ذكرته سابقا وهو زيارة القرى والبحيرات التابعه لمدينة SIXT سالزبورغ ، واخذنا التكسي ورحنا المطار حيث يوجد مكتب التاجير سيكستبداية كان يوم اجازة وكان هناك موظفة مناوبة وذهبنا لاستلام السيارة من مكتبهم بمطار سالزبورغ واستلمنا السيارة والجارمن الي استئجرناه مع السيارة وكان صغير الحجم اصغر من الجوال واعطتنا المفتاح وقالت السيارة موجودة بالموقف ورقم الموقف 26 جاهزة بانتظارك ورحت استلم السيارة وانا متحمس لبداية يومنا الجميل في قرى وبحيرات سالزبورغ واستلمت السيارة ويحليلها السيارة كبيرة ومزيونة وديزل نفس ما طلبتها بس قالوا للاسف طلبت اوتوماتيك وما عنا اليوم الاعادي ، قلت ما في مشكلة كنت سائق عادي لمدة اكثر من 10 سنين .

 

اخذت السيارة ويادوب بارجع للخلف وانها تطفي .. ارجع اشغلها مجرد اشيل رجلي عن دواسة الكلتش ترجع تطفي .. استمريت عالحال خمس دقايق وطلعت منها ريحة و دخنة قلت ممكن هاي من الديزل .. غشيم اول مره بسوق ديزل ( ندور الرخص – اقتصادي) والريحة مزعجة ، رحت للموظفة مره ثانية قلتلها القصة قالتي لا عادي ما في شي بس عشان ديزل لازم تدوس اكثر .. رجعت للسيارة ومشيت شوي بالموقف .. بس جد في شي غلط بالموضوع ..صح مو سواق رالي بس صار اكثر 15 سنة اسوق .. والريحة زادات والدخنة تطلع من السيارة 
رحت للموظفة مره ثانية وقلتلها في شي غلط بالموضوع  او ممكن انا غشيم تعالي معي وعلميني .
جت معي للسيارة بالنسبة للريحة قالت لي عادي ديزل .. دواسة الكلاتش قالت لي عادي لازم تظل دايس .. قلتلها انو طول عمري اعرف انه لما تحل الجير وتشيل رجلك عن الكلاتش السيارة تظل شغاله( نيوترل) .. قالت لا خل رجلك على طول على الكلاتش .. قلت ببالي ايش فهمك انت؟.. عندهم تكنيكس غير وهم ادرى ببلادهم وسياراتهم .

واخذت السيارة ومشيت فيها نص ساعه وهي معذبيتني وملعوزتني .. كل ماشيل رجلي عن الكلاتش تطفي وفضحتنا وسودت وجهني قدام النمساويين ، اللي يجي وراي ويشوف السيارة تطفي ايقلك شف هالغشيم ……..

وصدقا انا ما سقت السيارة اكثر من نص ساعه وفجئه وقفت وما رضيت تتحرك اخذنا جنب ووقفنا بجنب حديقة وانا احاول بالسيارة وما في فايدة ، حاولت اتصل عالشركة اليوم عطلة ومو بالساهل يمسك الخط واذا مسك المشكلة وين انه يحولوك من خط لاخر ، والمشكلة الادهى انه يسالني وينك .…………….ويني صج انه غبيشنو هالسؤال وانا ايش دراني ويني المكان اللي وقفت فيه لا في اسم ولا وصف وفوق هيك جهازهم الجارمن معطوب كنت بدي اكسرلهم اياه.

طبعا وقفنا واحنا نحاول نشغل السيارة او نتصل فيهم واثناء الوقفة وقفلي سيارة ماعرفت شنو هي اسعاف ، مطافي ، شرطة ، ماعرفت ونزله اثنين شباب بدهم يساعدوني وشكلهم ماعندهم شغل بس جزاهم الله كل خير صدقا كانوا كثير محترمين ومهذبين واتصلوا عالشركة اكثر من مره من تلفونهم الخاص واعطوهم العنوان وكتبلي العنوان عشان اعرف اوصفه للشركة ووقفوا معي نص ساعه ومابدهم يخلوني ،

واحنا نسولف ويسالوني وين رايح قلتلهم كانت النية نروح فوشيل ، موندسي ، سانكت جلجن ، ولف قانق …. قالوا ماشالله من وين عرفتهم ، قلتلهم هاي بركات سفاري منتدى رائع هو اللي ورطني فيكم . قالوا لا روح وشوف صج راح تنبسط ، المهم طلعت سيارة اسعاف وهم مسعفين وكانوا زاروا الاردن مع بعض الحالات الاسعافية ، وعلى قد ماكنت زعلان ومتنكد من اللي صارلي والحالة اللي انا فيها الا انهم خففوا علي مشكلتي وهونوها علي وتركوني وقالي الحين الشركة بتوديلك قسم الصيانة .قلنا الحمد لله هانت .

انتظرت نص ساعه وما جاني حد وانا اتصل عليهم ومحد يرد ، وفجئة وقفت سيارة الشرطة ونزله اثنين شرطة لفوا لفة حوالين السيارة ، رخصتك، جوازك ، من اللي معاك ووين رايح , بعد مااتؤكدوا مني اتصلوا عالشركة وقالولهم الصيانة بالطريق ، وقفوا معي شوي وصاروا يمزحوا ويسولفوا معاي وبعدين تركوني .

كلمة حق التعاون اللي شفته من سيارة الاسعاف وسيارة الشرطة والاحترام والادب كان مفاجيء لي خاصة لمسلمين وعرب ، حيث اني سمعت احدى القصص عن تعامل الشرطة السيء مع احد العرب المسلمين في النمسا كذلك .

انتظرت بعدها ساعة لين جاءت الصيانة وانا معصب… ومنكد.. وراحت الاجازة… وراح اليوم عالفاضي … وزوجتى مسكينة تحاول اتهديني وتواسينا بس جد كنت كثير معصب ولم تتوافر لدي الروح الرياضية وقتها ( للاسف وهاي كانت غلطه مني ) .

المهم جائت سيارة الصيانة وشاف السيارة وقال الكلتش محروق ، قلته اشدعوه .. حليتها .. شو الحل قال بنسحب السيارة للكراج و اوديك للمكتب تتفاهم معهم .، قلتله انا جاي اجازة مو جاي انسحب ، قال هذا اللي اجاك

وصلنا المكتب وكان استقبالهم غير لائق .. انا توقعت تتاسف لي عالموقف .. والوقت اللي ضاع … البهدلة اللي تبهدلناها .. ثلاث ساعات من الماعاناه مع السيارة .. وراح علينا نص يومنا .. غير المزاج اللي اتعكر 

قلتلها شنو الحل الحين .. في سيارة ثانية اخذها .. علما اني اني كنت مستاجر السيارة لمدة خمس ايام بايجار يومي 70 يورو ، وبكره بنروح زيلامسي ، والتوقيت محدد .. والفندق محجوز .يعني ما في وقت نضيعه

قالت لي اول شي اليوم عطلة … بنشوف تقرير الكراج .. ونعرف المشكلة من عنا ولا بسوء استخدامك .. بعدين سيارات اليوم ما عنا .. بكره ممكن تيجي سيارة ومش اكيد .. وايجارها 170يورو باليوم  ( بنز مرسيدس ) اي بزيادة 100 يورو باليوم عن اللي مستاجرها سابقا .. والحين ما بقدر اعطيك اي تاكيد لين بكره يجي المدير….؟؟؟؟؟؟ 

قعدت وانا مصدوم ، وصرت افكر ..اشلون سواقة السيارة نص ساعة بتخرب الكلتش ..انا مو اول مره اسوق ؟؟

بعدين يومنا ضاع .. حتى لو طلع المشكلة مو بسبببي .. وقعنا بمشكلة ثانية بنتعطل يوم.. وخساير جديدة وتعديل فندق .. والاهم بيخرب البرنامج اللي مسويه … شو الحل .. مره اقلها احجزي المرسيدس بكره ومره اهون .. بيتخربط كل برنامجي .. ايش اسوي الخمس ايام .. ادفع 170 يورو باليوم .. ومش اكيد احصل السيارة .. الغي الحجز واروح موصلات .. مو مرتب حالي عالمواصلات .. انا ماخذ كل العناوين والاحداثيات .. والرحلة بسالزبورغ وبزيلامسي مؤسسة على وجود سيارة .. حتى الفندق بزيلامسي كل اللي شافه قاله احسن فندق للي عنده سيارة ..
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ انطبخ راسي .. قعدت نص ساعة وانا افكر ،

المهم بعد تفكير طويل ومشاورات مع زوجتي قلنا خلني نسلك اليوم وبكره يحلها الحلال .
طيب شو نسوي الحين نرجع الفندق ولا شنو ، وانا مو مزعلني الا المسكينة زوجتى ما حبيت تنفقس بالاجازة مع العلم انها ما كانت تعرف خط الرحلة ولا وين رايحين ( مسويها مفاجئه ). وطلعتلي مفاجعه

وانا افكر اتذكرت خوينا احمد
العراقي مال امس  ، صاحب تكسي وخبير وهو قالي انه يطلع رحلات ( سبحان الله ربنا عرفني عليه بالامس لينقذ الموقف اليوم ) ، اتصلت عليه قلته انا اللي شفتك امس بساحة الاحتفالات وعرفني بس وين المشكلة قالي والله انا اليوم مشغول وطالع مع جماعه برحلة بس عندي صديق محترم تونسي اسمه ابو يونس خلني اشوفلك اياه ، وسبحان الله المرؤ على دين خليله ،قلتلكم كم ارتحت وسعدت بالتعرف على احمد العراقي وكذلك صديقه ابويونس التونسي رجال محترم ومتدين وسبحان الله ربنا عوضنا فيه عن التعب اللي شفنا بنصف يومنا الثاني بسالزبورغ واكملنا يومنا معاه وكان من احلى ايام اجازتنا ال 14 يوم .اقل من نص ولا هالشخص داخل عالمكتب بالمطار ، اكيد عرفني من شكل المستوره اللي معاي … قلتله قصتي قال هون عليك انا بوديك وين ما بدك وشرحت له برنامجنا اللي مجهزينه لليوم قالي لي اطلع وما عليك ..سالته عن السعر وكيف الايجار قال اطلع وماراح نختلف وكان متسامح ومتساهل ومحترم لابعد الحدود قضينا معاه يوم ولا اروع الله يجزيه كل خير ويبارك فيه وبذريته .

بدينا رحلتنا مع اخونا ابويونس التونسي باتجاه قرية وبحيره سانكت جلجن ، خلال الطريق كنا نسولف معاه ويشرح لنا عن النمسا والاماكن اللي نزورها وبحكم خبرته سهل علينا الجولات في القرى والبحيرات اللي كنا مخططين نزورها خلال هذا اليوم ،و بالرغم من ضياع نصف يومنا الاول مع السيارة والنكد اللي تنكدها الا انه سبحان الله ربنا عوضنا وباركلنا في بقية اليوم ورحنا كل الاماكن اللي كنا مخططين لها وزيادة .
خلال الطريق كان يدخل لنا على القرى اللي بطريقنا وبخبرته بالمنطقة كان يوقفنا باجمل الاماكن لالتقاط الصور وهون زوجتي اخذت بممارسة هوايتها بطقطقة الصور .

 

 

 

خلال الطريق شفنا مبنى غريب قال لنا ابويونس هذا مبنى ادارة شكة الريدبول مسويينه لشكل غريب يحيط به الماء

عند اقترابنا من قرية سانكت جلجن تظهر لك كبحيرة منخفضة بعض الشي تحيط بها الجبال الخضراء والمباني الخشبية وغيرها من مباني الطراز الاوروبي المميز ، صدقا المنظر يسويلك صدمه بالبداية وانت تتامل بالطبيعة و ينشرح صدرك من جمال المنظر والطبيعة والجو الرائع والذي يتخلله رذات من المطر احيانا ، وانت مو مصدق هذا حلم ولا علم مناظر لا يمكن ان تصدق انها طبيعية فعلا كانها رسومات موجودة فقط بالخيال، طيعا مقارنة بالجو والصحراء اللي عنا .

 

صاحبنا ابويونس مخلينا نتامل باللي شايفينه من جمال واحنا مصدومين ويقلك لسا ما شفته شي في اجمل من هيك

اكيد هو مو حاسس بموقفنا ، فاللي عايش بهالجنة ما يعرف بمعاناة المسكين اللي جاين من الصحراء
وحدثنا بموقف صار معاه قال جيت نفس هاي المنطقة مع اخ خليجي ولما شاف هالمناظر قعد عالارض وصار يبكي فلما ساله خوينا ليش تبكي ( قال هذا هيك واحنا بالدنيا شلون الجنة ) فعلا اتحس انها جنه في الارض ، فهم لهم الجنه بالدنيا واحنا الله يكتبها لنا بالآخره .

المهم وصلنا بحيرة سانكت جلجن وقعدنا نتمشى عند البحيره وطبعا لحق صور وراء زوجتى ، مو ملحقة طق صور ولكن بس شافت الاالعاب والمراجيح رمت الكاميرا وراحت للبنات الصغار وبدها تجرب العابهم وتتمرجح ،،،، والاولاد يشاهدونها باستغراب ايش فيها .. لباس غريب .. شكل غريب ..ومش باعمارهم .. وجاي تاخذ دورهم باللعب جربت المرجيحه والاولاد ينتظروا فيها عالدور .. خلصت اول مره ، المرجيحة طويله مثل حبل الغيسل تتعلق فيها وتروح للجهه المقابلة وترد ، وعادتها مرتين والاولاد يبرطمون .. يمكن سبوا علينا واحنا مو داريين

ابو يونس اقترح علينا اقتراح ، قال ليش ما تتطلعوا بالقارب رحلة وجولة بحرية مدتها ساعة وتنزلوا بمحطة قرية وولف قونق وانا بسبقكم بالسيارة وبلاقيكم هناك وهي كانت مقصدنا الثاني في رحلتنا لهذا اليوم ، عجبتنا الفكرة وشرينا التذاكر وكان في وقت لموعد الاقلاع فاخذنا جولة في القرية ما بين المباني والاسواق والطبيعه الجميلة .

 

 

في بداية القرية وبالقرب من البحيرة بيت يقال انه بيت موزارت ، موزارت بيته و ولادته في سالزبورغ ( هاي بتكون رحلتنا غدا ) ولكن كما يقال ان موزارات اصله من هاي القرية .

 

 

طبعا اخونا بو يونس قام بدور دليل سياحي وهي صورته للي يحب يتعرف عليه هو رجال طيب ومحترم .

 

 

 

حتى مقبرة القرية مررنا عليها ، طبعا القبور عندهم اشكال والوان وصور وشموع وزروع ،،، الحمد لله على نعمة الاسلام .

في المناسبات والاحتفالات يتم تزيين الشجر ، ويكثر المناسبات عندهم

بعد انتهاء جولتنا في القرية رحنا عند البحيرة عشان نوخذ دورنا للصعود للقارب ، وطلعنا وكان القارب طابقين
الطابق الارضي ومطعم بالاسفل وسطح القارب بالاعلى وبه كراسي وطاولات ويقدم خدمات من مطعم القارب

فعلا مضت الساعة ولم نشعر بها واحنا نتامل بجمال الطبيعه والجو الحلو ، كنا خلال الرحلة بضيافة الرفاعي

تتوقف القارب في محطات بالقرى المحيطة بالبحيره تحمل وتنزل الركاب مثل الباص وهاي القرى بعيدة عن المدينة ومنها ناس تسكن في اعلى الجبال الا انهم تصلهم كل الخدمات حتى المدارس والمواصلات والاتصالات وجميع الخدمات، واترككم مع الصور احسنلكم من السوالف

وصلنا وولف قانق بالسلامة ولقينا اخونا ابويونس بانتظارنا وقمنا بجولة بالقرية وهي شبيهه بالقرى المجاورة حيث ان معظم القرى بنفس الطراز تقريبا لذلك اترك التعليق لكم

 

 

 

 

طبعا الخشب وين ما تروح تشوفه وياكثر الخشب عندهم من كثر الغابات والاحراش فالنمسا مشهورة بتصدير الخشب حسب ما افهمت

 

حاولت اخذ غطسة بالبحيرة بس الماء كان بارد

 

وهاي صورة اخوكم ابويونس شكله يكلم الاهل وباين عليه انه تحت المراقبة المشددة من زوجته النمساوية ( ادعوا لاخوكم فانه الآن يسأل ) 

وهذول اعضاء فرقة وولف قانقية باللباس التقليدي

وانتقلنا من سانكت جلجن الى وولف قانق الي محطتنا التالية قرية موندسي تمشينا بالشوارع لا تختلف كثير عن ما سبقها الا انه لكل قرية لمساتها الفنية في الوانها وعمرانها وشوارعها ،

 

يعني هنا تحس نفسك بفلم كابوي بس ناقص المسدسات

 

وهنا الماء البارد للي بده يغسل ويجدد نشاطه

 

سبحان الله المباني والمطاعم والديكورات مكونتها بسيطة بس شكله جميل وانيق

 

وهذا الكلب اجلكم الله ما اطوله .. طويييللللللل وياكثر كلابهم

 

طبعا الآن صارت الساعه السابعه مساء والتعب دب فينا والجوع ايضا نسينا انفسنا من الصبح ولكم ان تتخيلوا كل ما مر فينا بهاليوم وشو انجزنا وسوينا ولسا الساعه السابعه مساء ، قلنا لابويونس متنا من الجوع خلنا نروح يكفي تعبنا ، قال لسا باقي على جدولك قرية فوشيل قلناله ما فينا حيل قال عشان مااتظل ببالكم بنمر مرور فيها
حتى مواقف السيارات شكلها حلو وخضراء .، … يا اخي والله بلادهم حلوه.

على الطريق وعند الانحدارات والانعطافات يوجد لوحات بها اسماء وتواريخ قال لنا ابويونس في هذه الاماكن وفي هذه التواريخ صار حوادث ومات اناس في هذه الاماكن ، عشان هيك البلدية تضع هذه اللوحات لتنبيه الناس ،
شوف الاسلوب في النصح .. ناس راقيين .

وصلنا سالزبورغ واخذنا ابويونس لمطعم مصري جديد بالمنطقة اخذنا منه اكلنا وروحنا الفندق واحنا في قمة السعادة على عكس ما بدئنا يومنا به من صعوبات ولله الحمد ، وصلنا الفندق الساعة 8.30 مساء ونحن منهكين من التعب وفي جعبتنا الكثير ، بالمناسبة كان حساب ابويونس لهذه الرحلة 140 يورو وحسب ما فهمت منه انه ايجار الساعه تقريبا ما بين 20-30 يورو بالساعه .