خواطر من رحلة أبويزن الي سالزبورغ – النمسا مايو 2012 الجزء الاول
استكمال لسلسة خواطر رحلتي الاولى لاوروبا يسعدني ان اضع بين ايديكم خواطر ومقتطفات من رحلتي الي سالزبورغ النمسا والتي استمرت لمدة ليلتين والتي كانت كما يلي .
تم الانطلاق صباحا من ميونيخ بواسطة القطار وكانت مدة الرحلة ساعتين كنا قد حجزنا مسبقا على الدرجة الاولى وكانت الرحلة مريحة وممتعه بين احضان الطبيعة والجبال الخضراء ، انتظرنا حتى وصول القطار في المحطة والتي كانت لا تبعد الا مسافة بسيطة عن موقع فندقنا في ميونيخ .
صار لي موقف وانا بالقطار يضحك ،،،،،،
،كنت ابحث عن القطار ومعي التذاكر اللي طبعتها من الانترنت 
ووصلنا القطار والمقطورة الخاصة بالدرجة الاولى وانا حامل الشنط والتذاكر وركبنا القطار جلسنا بانتظار تحرك القطار ، وانا اتكلم مع زوجتي ومستناسين ،،،،، 
واذ بي اتذكر وين التذاكر ..
وينهم ..مو مبينين…. وصابتني صرعه وين التذاكر وين ضيعتهم … شلون طاحوا مني.. داخل القطار ولا برا .. 
الشنط صاروا بالقطار.. وزوجتي بالقطار.. وانا ادور زي المربوش.. مره داخل القطار.. ومره برا. فكرت طاحوا مني وانا شايل الشنط.. وزوجتي اتدور بشنط اليد وبين الاوراق ومومحصلينهم… وزوجتي ماتت وهي تضحك علي علي وانا ادور وانا مثل المربوش…. و
القطار صار متحرك …..ويا سواد الوجه مع الاوروبيين ،
واحنا اندور شلت زوجتي عن الكرسي ولا هي قاعده عليهم 
وهي مو داريه وقاعدين اندور والتذاكر تحتها ، صح كنت بزتها من القطار بس عدت على خير ( انحرق دمي من الموقف وهي محششه ضحك ). 
طبعا كالعادة زوجتي مثل الملقوفه ماسكه الكاميرا واتطق صور بس مع سرعه القطار صورة تزبط وصورة ماتبين لين وصلنا محطة سالزبورغ نزلنا ندور على تكسي اول تكسي شكله كان نمساوي شافنا عرب او مسلمين راح نادى شب ثاني شكله قاله هذول من ربعك خذهم انت، طلع السائق جزائري وصلنا الفندق كانت شب محترم ومؤدب كثير وكان الفندق قريب من محطة القطار ممكن يبعد 10 دقائق فقط .
وصلنا الفندق كان وقت الظهر، الفندق بسيط .. نظيف .. خدمته ممتازة .. الموظفين متعاونين بس الحلو بالموضوع انه الفندق في قلب المدينة القديمة لسالزبورغ
لسا ما دخلنا الفندق الا وزفة هالعروس على العربات والخيل قدامنا والعرسان مبسوطين ويوزعوا ابتساماتهم عالعالم 
واقفين عالرسبشن ولسا ما استلمنا الغرفة ولا تمر افواج افواج وارتال ارتال متنوعه من الفرق الموسيقية بالازياء التقليدية المختلفة وحسب ما اخبرونا انه في يوم 19 و20 من شهر مايو عندهم احتفالات بالمدينة بس حسب ما فهمت من بعض الناس انه ايام الاحتفالات باوروبا كثير كعوامل مساعدة في جذب السواح .
اجواء فعلا كانت رائعه.. جو رائع .. احتفالات حلوة..لباس الناس بسيط معظمهم اللبس التقليدي .. مدينة قديمة النظافة مو طبيعية فيها .. الاسواق .. الشوارع ..الهدوء .. الزقاق، صدقا من اكثر المدن اللي حبيناها .
ريحنا شوي بالغرفة ونزلت عالرسبشن ، الموضفين كثير متعاونين اعطونا الخرايط والبروشورات اللي فعلا تسهل عليك التجول بالمدينة دون الحاجة لسؤال احد وهذه موجودة في كل المدن الاوروبية بحيث تسهل على السواح التجول دون دليل ، طبعا ان كنت مسوي قائمة بالمواقع والاماكن اللي ارغب بزيارتها من واقع ما شاهدته من تقارير الاخوان المفصلة في المنتدى.
يعني صدقا بقول اني زرت خمس مدن ميونيخ ، سالزبورغ ، زيلامسي ، فينيسيا ، باريس ، البرنامج اللي مسويه من خلال التقارير والصور اللي شفتها يكاد يكون افضل من البرامج اللي تسويها مكاتب السفريات لدرجة انه زوجتي كانت تستغرب وتفكرني زاير هذه المناطق قبل حيث اني اعددت البرنامج وكنت ماخذها (ياغافل لك الله) ما كانت حتى تعرف شنو المناطق اللي رايحينها ، وهذا بفضلا الله اولا و التقارير المفصلة اللي شاهدتها بهذا المنتدى الرائع واللي صعبت علينا انه نحاول نسوي تقارير مثلها فعلا هي تقارير احترافيا وما اورده لكم هو مجرد خواطر ومقتطفات لا تورطونا وتقولوا تقرير . 
وهاي لزوم القعدات والتسالي 
بعد الاستفسار من موظف الاستقبال توكلنا على الله وعزمنا بداية جولتنا من ابعد نقطة وهي قصروحديقة الهيلبرون حيث انه بسبب موقع الفندق الممتاز في قلب المدينة القديمة لم نستخدم المواصلات الا للوصول الى القصر اما باقي الجولات في مدينة سالزبورغ كانت مشيا على الاقدام .
ركبنا الباص من خلال موقف الباصات الموازي لنهر السالزبورغ والذي يبعد 200 متر فقط عن الفندق للوصول الى قصر الهيلبرون وحديقة القصر والنوافير والالعاب المائية الموجودة حيث يتم ادخال مجموعات كل نصف ساعه تقريبا مع المرشد، والذي يقوم بشرح مفصل عن القصر والحدائق يتخللها العاب مائية يغرق الناس فيها بالماء وكل شوي وانت ماشي تشوف الماي طالعلك من امامكم وخلفكم ومن تحتكم ومن فوقكم ما تدري من وين تيجيك الماي بس صدقا ممتعه .
اتصورت معاه وانا طالع وهو مستانس يقولي عشان تقول لهم بسفاري انه هذا هو اللي غرقني وهو بانتظاركم ، والحصن بعده منيع محد قدر عليه
خرجنا من الحديقة واحنا مبللين من الماي وقال تقدرو تروحوا تشوفوا القصر والحدائق اللي برا وفي قصر فوق عالي قال اللي في شده يروح 
وهاي صور القصر والحديقة
زوجتي طلعت من القصر لقيت هذا الكلب اجلكم الله بانتظارها بالخارج .. طبعا ماتت خوف
ورجعنا بالباص و نزلنا عند نهر السالزبورغ وياحلو المشي عند النهر مع الجو العليل والهواء النظيف والوجهه الحسن صج ماء وخضار ووجهه حسن
بعد ما تجولنا على نهر السالزبورغ مشينا باتجاه قلعه سالزبورغ وهي ظاهره من كل مكان بالمدينة القديمة نظرا لكبرها وعلوها وممكن تصعد لها بواسطه مقطورة او سكة حديدية تتجهه للاعلى بشكل مائل اتجهنا من خلال الطريق المؤدية للقلعه وكانت الطريق والساحات مليئة بالناس والعربات والمحلات والرسامين ومصور بجانب القلعه يصور الناس بملابس تقليدية وانتظرنا بالدور للصعود بواسطة السكة الحديدية ووصلنا القلعه وما اكبرها من قلعه ، مدينة موب قلعة
اثناء وجودنا بقلعة سالزبورغ لفت انتباهي وجود عدد كبير من الكلاب اجلكم الله بكثرة ومكان احتفالات ومسابقات
وجوائز
Dog Show
وفهمنا انه في كل سنة يقام احتفالات او مسابقات للكلاب اجلكم الله ، وعينك ماتشوف الا الكلاب اكثر من البشر اشكال .. الوان .. احجام .. تسريحات .. لباس .. اكسسوارات وكل هذا للكلاب اجلكم الله ، هناك اهمية كبيرة للكلاب واهتمام بها كما يهتم الاهل بابنائهم واكثر والكلاب عندهم بدون تشبيه اكثر من عدد الاولاد عندنا .
يلاحظ على الشعب الاوروبي والاجانب عموما مع كبر سنهم او حتى بشبابهم ليس لديهم اولاد او بالكاد تجد لديهم ولد واحد هربا من العائلة وتحمل المسؤولية .
طبعا زوجتي من خوفها من الكلاب طول ما احنا ماشيين وهين تتنقوز يعني الكلب اللي ماشي بحاله وموشايفها من نقزتها يصير يصارخ . قرقعتنا قد ما خافت ما صدقنا على الله واحنا ننزل من القلعه ، طبعا الشوارع بعد مليئة بالكلاب …… ولكم ان تتخيلوا الربشة اللي سوتها حتى من خوفها من احد الكلاب 
صرخت صوت.. الكلب نفسه خاف وصاحبت الكلب زعلت 
قالتلها شنو في .. كله كلب … زين خوفتيه الحين .
من الملاحظات اللي شفتها وبتمنى يسووها بعالمنا العربي ، انه بالرغم انها قلعه مرتفعه الا انها لا تخلو من المطاعم والخدمات والنظافة والحمامات النظيفة وهي غير متوفره بكثير من الاماكن السياحية الموجودة ببلادنا .
مع انتهاء جولتنا في القلعه يكون انتهى يومنا الاول في سالزبورغ وبدات ليلتنا الاولى في مدينة سالزبورغ القديمة
كما اشرنا سابقا بالنسبة لططططووووووووووووووووللل اليوم في اوروبا يعني خلال اليوم يمكنك انجاز امور كثيره والنهار لم ينتهي بعد ، كان هذا اليوم هو يوم السبت وهو يوم عطلة لديهم وجميع المحلات والاسواق والمطاعم مقفلة باستثناء عدد قليل المطاعم حيث تناولنا وجبة بيتزا في المطعم الوحيد القريب من الفندق علما ان الجو العام للمطعم غير مريح فهو مطعم وبار ويا كثر هالبارات عندهم الناس موجودة 24 ساعه مالها عمله غير الشرب والشرب مو بكاسات شرب بسطلول كبيره ، ما اتحس براحه وانت قاعد بين هالاشكال سهر وسكر . ( الحمد لله على نعمة الاسلام ) ، خلصنا الاكل والحقناها بايسكريم وقلنا خلص اليوم الاول على خير وكان يوم جميل جدا.
قعدنا بالفندق نستريح من يومنا الطويل واذ باصوات خارج الفندق ، حيث ان موقعنا بقلب المدينة القديمة واللي قريبة من ساحة موزارت والمتحف وساحة الاحتفالات القريبة من الكنيسة ، اصابنا الفضول وماعرفنا ننام وقلنا خلنا نروح نشوف شنو في برا بهالليل، لقينا الناس بالشوارع واحتفالات وفرق تعزف الموسيقى والناس متجمعه حولهم بكثرة شي قاعد وشي واقف وشي يتمشى ، اتمشينا شوي بالساحة والمناطق القريبة من الفندق ووصلنا حتى النهر وهو قريب كثير من الفندق وكان الجو كثير رائع وبعد جولتنا الليلية في المدينة والنهر رحنا وقعدنا نتفرج عالفرقة وهي تعزف .
اثناء جلوسنا نشاهد الفرقة لفت انتباهي صف سيارات التكسي بانتظار الركاب وفي شخص شايفه من بعيد واقول لزوجتي هذا الرجال شكله عربي حتى لبسه وقميصه لا دمه مبين عربي دون شك حملت حالي ورحت باتجاهه وهو قاعد عند سيارته وقربت منه وانا اطالع فيه ويطالعني وصرنا نضحك كلمته بالعربي مباشره دون سؤال انا شايفك من بعيد واحساسي يقولي انك عربي قالي وانا شايفك انت وزوجتك من بعيد ومن لبسها عرفتكم عرب ، تكلمنا شوي عن المدينة والعرب هو من اصل عراقي صار له 15 سنة بالنمسا مقيم هو وعائلته وسبحان الله شكله مريح واسمه احمد ( بالمناسبة عندي هاي الحاسة وبقوة انه من اول لقاء بالناس يا ارتاح له او لا وغالبا تكون صحيحه ) صرنا نتكلم عن العرب والناس المقيمين بالنمسا قاله انه في عدد لا باس به من السواقين عرب واتراك وهو من الشباب المتدين والله اعلم ، هذا ما بدى لي وخلاني ارتاح له بزيادة واعطاني كرته وارقام تلفوناته وقالي لي اي شي تحتاجه كلمني .
وبذلك انتهى يومنا الاول بسالزبورغ وذهبنا للنوم للتجهز ليوم اخر حافل بالمفاجئات ، حيث كان مخططنا لليوم الثاني هو استلام السيارة التي كنت اجرتها مسبقا والتجول في القرى والبحيرات التابعة لمدينة سالزبورغ وهي سانكت جلجن ، وولف قانق ، موندسي ، فوشيل . وهي رحلة غدا انشالله .ويومنا الحاففففللللللللل .
